๑.เพ็งเดือนสิบหมู่เจ้า อ้ายน้องอาวอาแห่แหนเข้าวัดวา ข้าวปลามาพร้อม
ยกมือวันทาน้อม พระรัตนตรัย
เพื่อขอโชคขอชัย ขอพรพระเจ้า
๒. ให้เหมิดโศกเหมิดเศร้า มีแต่ความสุข
บ่ให้มีความทุกข์ ใดใด๋มาใกล้
เทิงหมากผลให้ได้ เต็มไฮ่นาสวน
ของกินอยากอันควร มั่งมีหลามล้น
๓. แล้วจั่งพากันด้น ลงไปไฮ่นา
นำห่อข้าวปูปลา หมากพลูมีพร้อม
ใบตองห่ออ้อมล้อม ต่องไผต่องมัน
พากันหยายนำกัน แกนาแกไฮ่
๔. เอาของกินไปให้ เอาของใช้ไปหา
ให้พ่อแม่ปู่ย่า ตายายผู้ตายพ้น
ให้ได้กินเหลือล้น ให้อิ่มจนเหลือหลาย
ให้อยู่ดีสำบาย เบิ่งแงงลูกเต้า
๕. ให้ได้ข้าวเต็มเล้า ปลาแดกเต็มไห
ต่ำหูกฝ้ายหมี่ไหม กะให้งามปานย้อย
หากแม่นเลี้ยงควายน้อย กะให้โตใหญ่
ได้ไถนาไวไว บ่มีขัดข้อง
๖. ให้ฟ้าฝนตกต้อง น้ำท่าบริบูรณ์
ขอให้ค้ำให้คูณ เหมิดซุมพี่น้อง
ให้อยู่กันล่องค้อง ถืกกันลองคอง
ความเป็นญาติพี่น้อง อย่าข้องหม่นหมอง พู่นแหล่ว
ศักดิ์เรือง วลึ /บ้านแมกไม้ร้อยเอ็ด / ๒๓ กันยา ๕๓/วันบุญเดือนสิบหรือบุญข้าวสาก
ไม่มีความคิดเห็น:
แสดงความคิดเห็น